شروق أشرف الجمل… حكاية نجاح حقيقي خارج حسابات المجموع!
شروق أشرف الجمل … حكاية نجاح حقيقي خارج حسابات المجموع!
في زمن بقى المجموع هو الحاكم، والكلية هي المعيار، والصندوق هو المقاس الوحيد للقدرات… ظهرت شروق أشرف لتكسر القاعدة، وتقول لكل طالب وطالبة في الثانوية العامة:
“النجاح مش درجات على ورقة… النجاح الحقيقي جوه قلبك وعقلك وروحك.”
من هنا بدأت القصة…
زي آلاف الطلبة، دخلت شروق امتحانات الثانوية العامة، وكانت ضمن دفعة كلها توتر وخوف وأحلام معلقة على رقم من 3 خانات.
بس… النتيجة طلعت، والمجموع ماكانش على “مزاج” المجتمع، ولا يكفي علشان تدخل كليات القمة اللي بيحلموا بيها كل الناس.
“كنت علمي علوم، وجبت مجموع ميدخلنيش كلية قمة، وأصحابي كانوا جايبين 95% و98%، ودخلوا كليات محترمة جدًا، بس النهاردة… أغلبهم بيشتغلوا في مجالات بعيدة تمامًا عن دراستهم.”
أما شروق… فقررت تسمع لقلبها، مش للناس.
دخلت كلية من كليات الأدبي، وده رغم إنها علمي، واختارت طريق مختلف… يمكن مش عليه زحمة، لكنه كان مليان إصرار.
النجاح مش يافطة… النجاح إرادة
من كلية عادية إلى دراسات عليا، ومن الكتب إلى الميدان، ومن طالبة عادية إلى أخصائية تخاطب ناجحة، لها اسم ومكان، وبتتقال في حقها كلمة “محترفة” مش مجاملة.
والأجمل؟
طلعت على شاشة التلفزيون، في برنامج “الخامسة مساءً” على قناة الصحة والجمال.
كانت واقفة قدام الكاميرا بكل ثقة، وقالت لنفسها:
“أنا وصلت… ومش مصدقة!”
مش لأن الشاشة حلم، لكن لأن الطريق كان صعب، والمجتمع مش بيرحم، وهي ما استسلمتش.
الرسالة لكل طالب وطالبة في الثانوية العامة
لو انت دلوقتي قاعد وسط الكتب والقلق، أو بتفكر في نتيجتك اللي جت أقل من اللي كنت بتحلم بيه، اسمع شروق… وشوف تجربتها.
الثانوية العامة مش نهاية المطاف
الكلية مش آخر الطريق
والفشل في مشروع أو خطوة مش معناه إنك فاشل
النجاح الحقيقي هو إنك:
-
تعافر رغم كل الظروف
-
ترمي كلام الناس ورا ضهرك
-
تخلي عينك على هدفك
-
وتكون مستعد تحفر في الصخر علشان حلمك
شروق… مش مجرد اسم
شروق بقت نموذج، مش بس لطالبة مجتهدة، لكن لحد عرف إمكانياته واشتغل عليها، لحد اختار طريقه بإرادته، وقرر ينجح “رغـمًا عن أي حاجـة”.
وفي الختام…
لو عندك حلم، متخليش مجموع يحكمه…
ولا كلية تحدده…
ولا حد يحبطك…
ابدأ من دلوقتي، وصدق في نفسك، واشتغل، وانجح على طريقتك.
📍 تحية تقدير وإعجاب للأستاذة شروق أشرف،
صاحبة الإرادة الحديدية،
ومصدر إلهام لكل شاب وبنت في بداية الطريق.
✍️ بقلم: نادر حسين
