فلوس… شهرة… نجاح… ولسه حاسس بفراغ؟
بقلم: أحمد يسرى
الإنسان ممكن يكون عنده كل حاجة…
فلوس… نجاح… شهرة…
ومع ده كله… جوه قلبه فاضي.
وفي نفس الوقت…
ممكن تلاقي حد بسيط جدًا…
ما عندوش نص اللي عند غيره…
لكن قلبه مطمّن… مرتاح…
عارف هو عايش ليه… ورايح على فين.
الفرق كله… في معنى الحياة.
في ناس حياتهم كلها بقت جمع…
فلوس… شهرة… إعجاب الناس…
لكن عمرهم ما وقفوا لحظة يسألوا نفسهم:
أنا بجمع ده كله ليه؟
وبعد سنين من الجري…
يكتشفوا إنهم جمعوا كتير…
لكن ضاعوا هما في النص.
أما الإنسان البسيط…
قلبه هادي ومطمّن…
لأنه فاهم هو عايش ليه… ورايح على فين.
ناس كتير فاكرة إن الفراغ اللي جواها
سببه قلة الفلوس…
فتجري ورا الفلوس…
وبعد ما توصل…
تكتشف إن الفراغ لسه موجود.
يفتكروا إن المشكلة في المكانة…
فيجروا ورا المكانة…
وبعدين يلاقوا قلبهم مش مرتاح برضه.
الحقيقة بسيطة…
الفراغ اللي جوه الإنسان
ما يتملّاش بالدنيا.
لو عشت للدنيا بس…
هتفضل طول عمرك تايه…
كل ما توصل لحاجة… تحس إن في حاجة ناقصة.
لكن أول ما تفهم إن حياتك ليها غاية…
وإن كل فرحة وكل وجع ليه حكمة…
ساعتها قلبك يهدى.
تفهم إن النجاح مش فلوس بس…
وإن الخسارة مش فشل بس…
وإن ربنا ساعات بيبعد عنك حاجة…
عشان يحميك من حاجة أكبر.
وأخطر لحظة في حياة الإنسان…
لما يكتشف بعد سنين طويلة
إنه عاش عمره كله…
من غير ما يعرف كان عايش ليه
بقلم أحمد يسرى
